BACOLOD CITY — Apisar madamo nga mga overseas Filipino workers (OFW) ang nagapabor sa deployment ban sa Kuwait nagareklamo naman diri ang mga skilled workers.
Sa interview sang Bombo Radyo Bacolod kay Mary Ann Amante sang Brgy. 2, Bacolod City, pabor siya sa deployment ban bangud nga isa man siya sa linibo ka mga OFW’s nga may indi maayo nga nadangtan sa ila mga amo nga Kuwaiti’s.
Manug-apat na katuig si Amante sa Kuwait kag sa karun nagahulat na lang ini sang tawag sang embahada sang Pilipinas para sa schedule sang ila pagpauli sa Pilipinas bangud nga kabahin man siya sang amnesty.
Apang gin-ako sini nga wala siya sang legal nga dokumento sang nagsulod sa Kuwait sang 2014 kun sa diin upod sini sang una ang iya magulang nagatrabaho man sa nasambit nga pungsod.
Isa ka bulan kag tunga lang siya nagtiner sa iya una nga employer bangud nagpakitluoy ini sa iya magulang nga baklon siya sang
employer sini bangud pagmaltrato man sang iya amo.
Apang sang nag-upod na sila sang iya magulang gin-maltrato man sila sang amo sini, tatlo ka bulan nga wala ginswelduhan rason nga nagpalagyo ang iya magulang kag nakapauli na sa Pilipinas.
Samtang si Mary Ann natapos gid ang iya duha katuig nga kontrata. Pagkatapos sang kontrata sa ikaduha nga amo, nagtudlo si Amante sa billingual school apang nagligad nga sinimana nag-untat naman ini bangud nga ginakulbaan siya tagsa ka maguwa sa eskwelahan bangud sang mga hitabo nga may pila ka Kuwaiti’s nga nagapangdakop sang mga Filipipina kag ginasakay sa ila mga salakyan.
Santo naman sa pagpakighinun-anon sini sa iban nga OFW’s, madamo sa ila ang nagapabor sa deployment ban ilabi na ang mga ginpang-maltrato man apang indi pabor diri ang mga skilled workers bangud nagakadalahig sila.
