Dako ang kalipay sang tanan nga staff sang Carlos Hilado Memorial State College (CHMSC), nga karun sila ang isa na ka state university kag pagatawgun na nga Carlos Hilado Memorial State University (CHMSU).
Suno kay Rhoderick Samonte, director for external affairs sang CHMSU, ginakalipay nila nga nadayun nagid man nga mangin State University ang kolehiyo bangod madugay naman nila ini nga ginapaabot.
Dako man ang pagpasalamat sini sa tanan nga nagtrabaho kalakip na ang mga opisyales, manunudlo, estudyante, alumni, staff kag partners sang buluthuan agud nga malab-ot ang handom kun sa diin ang CHMSU ang pinakabag-o sa karun nga State University sa Pilipinas.
Ginpasalamatan man ni Samonte si Bacolod Lone District Congressman Greg Gasataya, anay Negros Occidental 3rd District Congressman Albee Benitez kag 5th District Congressman Alejandro Mirasol nga naghuman sang House Bill kasubong man sa Senate Bill ni Senator Paolo Benigno “Bam” Aquino IV tubtob sa ini ang mangin layi sang Abril 26, 2019.
Paathag ni Samonte nga nagdugay lang ang proseso sa pagg-evaluate sang Commission on Higher Education (CHED) bangod sa COVID-19 pandemic gani kahapon lang naaprubahan.
Suno diri, kahapon sang aga lang sa ila nga nangin meeting gin-anunsyar sang CHED en banc nga ang CHMSC and State University na, gani ginahulat pa sang mga ini ang opisyal nga resolution.
Ang proseso sa paghimo nga State University sa eskwelahan ang gin-umpisahan ni former CHMSC president Dr. Renato Sorolla kag ginpadayun sang karun nga presidente nga si Dr. Norberto Mangulabnan.
Si Dr. Mangulabnan amo ang mangin pinakauna nga presidente sang Carlos Hilado Memorial State University (CHMSU). Samtang, nagapati ang director for external affairs sa Carlos Hilado Memorial State University (CHMSU) nga sa masunod pa nga tuig magatake effect ang pagdugang sang pondo sang unibersidad nga kaupod sa pagsaka sang estado sini sangsa sang sila ang State College palang.
Suno kay Rhoderick Samonte, mahimo nga wala pa sang mangin pagdugang sa pondo sa unibersidad sa Academic Year 2022-2023 bangod nakaplastar na sang budget para sa bilog nga tuig.
Kadungan sini, mahimo nga wala man sang pagdugang sa admission sang estudyante bangod apisar nga madamo sang maga-enroll, nakatalana na ang mga ini sang ceilling sang pagabatunon nga estudyante santo sa naalukar nga pondo.
Suno kay Samonte, mahimo lang madugangan sang budget kun imando sang Commission on Higher Education (CHED).
Suno diri, ang pinakaposible nga pag-epekto sang mga benepisyo sang pag-upgrade sang Carlos Hilado Memorial State College (CHMSC) sa Carlos Hilado Memorial State University (CHMSU) ang mabatyagan na sa Academic Year 2023-2024.
Ini bangod makahuman na sang panibag-o nga budget cycle nga nagakaangay para sa mga programa sang unibersidad.
Pasalig naman ni Samonte nga magapabilin nga libre ang tuition sang mga estudyante bangod mandato na ini sa tanan nga mga higher education state universities kag colleges agud nga mahatagan sang kahigayunan nga makatapos kag makaangkon sang degree ang mga qualified kag deserving nga mga estudyante.
Magluwas sa pagdako sang budget allocation, nagdamo man ang oportunidad para sa CHMSU nga mangin pagpanghangkat sa administrators kag faculty and staff sang unibersidad nga mapanindugan ang status.
