Ginkompirmar sang pinuno sang Provincial Disaster Risk Reduction and Management Office (PDRRMO) nga nagnegatibo ini sa RT-PCR test subong man ang 14 ka iban pa nga mga miyembro sang PDRRMO kag apat ka mga katapo sang Philippine Coast Guard.
Madumduman nga ginquarantine ang 19 ka mga persona kalakip na si Dr. Zeaphard Gerhart Caelian matapos nga magpositibo ang driver kag empleyado sang PDRRMO nga residente sang Murcia kag responder sang Municipal Disaster Risk Reduction Management Office (MDRRMO) sa banwa sang Pontevedra, Negros Occidental.
Sa interview sang Bombo Radyo kay Caelian, ginpahayag sini nga Hulyo 3 sang gab-i sang ginpaidalum ini kaupod ang 18 ka iban pa sa facility quarantine kag ginkuhaan sang swab tests.
Kahapon, suno sa iya, nagwa ang resulta sang tests kag lunsay negatibo ang mga ini.
Bangud diri, suno kay Caelian, sarang na sila nga makagwa subong nga adlaw kag balik na sa trabaho ang mga ini.
Suno sa iya, mapreparar na sila sa pagsulod sang bag-o nanaman nga mga batch sang locally stranded individuals (LSIs) bangud manugtapos na ang duha ka semana nga pagsuspendi sa pagbalik sang mga ini.
