Lapit na lang mahuman ang mga ginapatindog nga mga stalls sang firecracker vendors sa likod sang Pope John Paul II tower sa Bacolod City reclamation area.
Sa interview sang Bombo Radyo kay Ryan Villaruz, representative sang Bacolod City Fireworks and Firecrackers Association, yara na sa Bureau of Fire Protection- Bacolod ang ila permit kag ginapasalamatan sini nga gina-akumudar man sila sang ila ginapangayo.
Suno diri, matapos ini hulaton naman nila nga mapermahan na ni Bacolod City Mayor Greg Gasataya ang permit.
Sa karun, padayon ang ila pagtukod sang ila mga stalls apang indi pa sila maka-umpisa sa pagbaligya basta nga wala pa sila sang gina-uyatan nga permit.
Pahayag ni Villaruz, nadelay ang ila nga construction sang mga stalls bangod sa asod-asod nga paglabay sang bagyo.
Ginalauman man sini nga maumpisa na sa masunod nga semana ang pagbaligya nila sang firecrackers kag fireworks.
