Lunsay negatibo ang resulta sang drug test nga ginpatigayon sa pila ka mga police personnel sang Bacolod City Police Office.
Nahibaluan nga personal nga ginbuksan kag gin-anunsyar ni Bacolod City Mayor Alfredo Benitez kahapon ang resulta sang drug test sang 43 ka mga kapulisan nga una na nga ginpatigayunan sang surprise drug test kag ini ang ginalakipan sang mga station commander nga may ranggo nga police lieutenant samtang ang pinakamataas amo si Police Col. Noel Aliño bilang isa ka full-fledged police colonel.
Suno kay Bacolod City Police Office Director Police Col. Noel Aliño, negatibo ang tanan nga resulta sang ginpatigayon nga drug test.
Nagapasalamat man ang city director sa negatibo nga resulta sang drug test sang mga kapulisan bangud napamatud-an sini nga ang mga station commanders sa syudad sang Bacolod ang wala nagaintra sa mga illegal nga butang.
Ginkalipay man sini ang negatibo nga resulta bangud mangin basehan ini nga ang mga kapulisan sa syudad sang Bacolod ang dapat mangin role model sang mga pumuluyo.
Masunod nga patigayunan sang drug test ang iban naman nga personnel sang BCPO.
Nagpangayo naman ini sang bulig sa media nga buligan sila nga mapasanyog pa ang mga programa kag mga aktibidad nga ginapatigayon sang Bacolod City Police Office.
