May mandato ang Bacolod City Police Office (BCPO) Director sa mga Station Commanders nga nakasakop sang sunod-sunod nga mga shooting incident sa ciudad sang Bacolod, nga ini ang matutukan kag mapapanabat ang mga suspetsado.
Ini kasunod sang nagasinundanay nga insidente sang pagpangluthang sa nasakupan sang Bacolod Police Station 6 kun sa diin ginluthang ang isa ka construction worker; sa Bacolod Police Station 2, kun sa diin ginluthang naman ang gina-alegar kawatan; kag sa Bacolod Police Station 1, kun sa diin ginluthang kaina sang aga ang isa sa mga suspect sa abduction case sang 5 anyos nga bata nga babayi gikan sa Talisay City.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company kag Spokesperson ni BCPO Director Police Col. Noel Aliño, ginmanduan na sang City Director ang Station Commanders sa nasambitan nga mga lugar nga maid-id nga imbestigaran ang kaso.
Pahanumdom sini nga dapat matumod ang mga suspects kag mapasakaan sang nagakaigo nga kaso.
Paathag ni Brillo nga ang bulong lamang agud mapanas ang mantsa sang mga unsolved crimes sa Bacolod City amo ang pagsolbar sang mga kaso sang pagpamatay.
Bangod sini magluwas sa mga involved nga Station Commanders, ginmanduan naman ni Aliño ang intelligence unit sang BCPO nga magbulig sa pag-imbestigar kag magkoordinar sa mga Station Commanders.
Ginmando man sa Operation Management Unit ang maayo nga deploymenta sang masobra isa ka libo nga Police personnel sa mga startegic locations sa nagakaigo nga oras agud mapanubo ang kaangay nga mga krimen.
Aminado man si Brillo nga sa masami matapos ang pagka-aresto sang dako nga drug personality, kasunod nga mga inadlaw ukon semana, may ara man nga ginaluthang.
Samtang sa dalayun nga imbestigasyon, nagakatukiban nga ang mga biktima ang imbulbado sa illegal nga transaksyon.
