Gindemolish na ang mga structure sa sulod sang Bacolod Vendors Plaza nga ginhimo nga drug den ukon suluyupan sang iligal nga druga sang damlag lang.
Madumduman nga sang Lunes sang hapon, walo ka mga persona ang naaresto sa ginpatigayon nga buybust operation sang Philippine Drug Enforcement Agency – Special Enforcement Unit sa Vendors Plaza.
Ang mga nadakpan amo sanday Joshua Cagalcal, 25 anyos; Jayhan Mission, 39 anyos; Roy Ageña, 45 anyos; Hermel Taghoy, 35 anyos; Reynard Villamor, 33 anyos; Brian Alison, 36 anyos; Danny Rodriquez, 29 anyos; kag ang ila subject person nga Jovie Bermudes, 35 anyos.
Nakuha sa paghinakop sang mga nadakpan ang pito tanan nga sachets sang suspected shabu nga may kabug-aton nga 10 ka gramos kag may balor nga P68,000.
Sa interview sang Bombo Radyo kay Executive Assistant to the Mayor Ernie Pineda, ginguba gilayon ang mga structures sang Martes.
Suno kay Pineda, ang idalom sang mga lamesa sa fish section ang ginbutangan sang siklat agud himuon nga drug den gani daw kaangay ini sang pantyon kagamay.
Ginguba man sang City Legal Office Enforcement Team ang iban nga hayob-hayob sa sulod sang merkado.
Bangud sini, kitaon na kun ano ang bag-o nga ginbutang sa sulod sang merkado.
Suno kay Pineda, may magamonitor kun ano ang nagakatabo sa Vendors Plaza agud indi na mangin drug den kag naghingyo ini sa Barangay 12 kun sarang sila makabulig.
