Nagpanindugan ang spokesperson sang Special Joint Task Force-Negros nga wala natapos sa interment ni Negros Oriental Governor Roel Degamo ang ila nga pagbantay sa probinsya.
Sa interview sang Bombo Radyo Bacolod kay Major Cenon Pancito III, wala natapos ang obligasyon sang Special Joint Task Force-Negros sa lubong sang gobernador apisar nga nangin symbolic ini apang may yara pa sang iban biktima man ang nasambit nga massacre.
Suno kay Pancito, gintukod ang Special Joint Task Force-Negros sa tintuyo nga tapuson na ang violence nga nagakatabo sa probinsya.
Suno diri, committed ang mga ini nga magtuman sang mandato sang nasambit nga task force kun sa diin ginalakipan sang padayon nga paglagas sang mga nabilin nga suspek sa pagpatay sa gobernador kag sa walo ka iban pa kasubong man bungkagon ang support system sang armado nga grupo, bangud indi lang napulo ang ginatudlo suspek kundi may yara ini sang back-up kun sa diin may madamo sang resources kag may gahum.
Kabahin man sa ila nga mandato ang paghatag sang proteksyon sa pamilya sang gobernador, sang iban pa nga biktima kag kabug-usan nga mga pumuluyo sang Negros Oriental.
Nagapati man ang Army opisyal nga sa pihak sang natabo, ang mga tawo ang nagapangabuhi sang normal bangud siya mismo naeksperyensyahan nga ang mga tawo ang wala nahadlok nga magwa agud nga maglagaw ukon magpaliwa-liwa.
Suno kay Pancito, sila mismo ang luyag na nga madakpan ang iban pa nga may kahimuan sang krimen, mabungkag ang support system sang mga ini agud nga matapna ang paghimo sang kalakasan agud man nga mabalik na ang kalinong sa probinsya bangud sila ang may yara man sang iban nga ulubrahon kag may pamilya man nga kinahanglan paulian.
Magapabilin man ang ginapatuman nga deployment kag checkpoints sang Special Joint Task Force-Negros sa 21 ka mga identified strategic areas sa Negros Oriental.
Ginpahayag man sini nga ang uniformed personnel kaangay sang Philippine Army ang symbolo sang kalinong kag indi dapat pagkahadlukan.
