Gindayaw ni North Korean leader Kim Jong Un ang mga suldado sang North Korea nga gin-utas ang ila kaugalingon nga kabuhi paagi sa pagpalupok sang granada samtang nagapakig-away para sa Russia batok sa Ukraine, sa tunga sang nagapadayon nga giyera.
Sa iya nga speech, gintawag ni Kim ang mga suldado nga “mga baganihan” nga wala sang pagpangduha-duha sa pag-utas sang kabuhi agud maproteksyunan ang kadungganan sang ila pungsod.
Santo sa mga report sang South Korea, ginabulubanta nga 15,000 ka mga soldado sang North Korea ang ginpadala sa pagbulig sa Russia sa operasyon sa nakatundan nga Kursk, kag kapin sa 6,000 ang ginapatihan nga napatay sa gyera apang wala pa ini ginkumpirmar sang North Korea ukon Russia.
Suno sa intelligence reports kag mga defectors, ginapatihan nga ginmanduan ang mga suldado nga utason ang kaugalingon nga kabuhi sa baylo nga dakpon sang kaaway.
Nahibaluan nga sa North Korea, ang pagkadakop sa isa ka soldado amo isa ka pagluib sa pungsod.
Sa separado nga report, pila ka North Korean nga napriso sa Ukraine ang nagpabutyag sang ila paghinulsol nga wala nila gin-utas ang ila nga kabuhi.
Magluwas sa pagpadala sang mga soldado, nagpromisa man ang North Korea nga magpadala sang mga trabahador agud magbulig sa pagtukod liwat sang mga lugar sa Kursk region sa Russia.
