KYIV – Wala nagsungka kag ginbatuan sang mga suldado sang Ukraine ang ultimatum sang Russia nga isungka sang mga ini ang ila mga armas sa port sang Mariupol, nga suno sa Moscow, amu ang pinakadako nga premyo sang malapit duha ka bulan nga gyera.
Suno kay Ukrainian Prime Minister Denys Shmyhal, ang mga tropa sa Mariupol ang padayon pa nga nagabato apisar sang demand sang Russia nga magsurrender sa kaagahon.
Suno sa iya, wala pa nalutos ang ciudad kag kontrolado pa sang mga suldado sang Ukraine ang pila ka bahin sang southeastern Ukrainian city.
Sang Sabado, ginpahayag sang Russia nga kontrolado na sini ang mga urban areas kag padayon nga nagapakigbato ang mga Ukrainians sa Azovstal steelworks sa atubang sang baybayon sang Azov.
Kun makuha gid man snag Russia ang Mariupol, nga amu ang main port sa rehiyon sang Donbas, ini ang mangin strategic nga premyo para sa Russia, bangud ini ang magakonekta sa teritoruo nga ginauyatan sang pro-Russians separatists sa nasidlangan nga bahin sang rehiyon sang Crimea nga gin-annex sang Moscow sang 2014.
Sa karun kapin apat ka million nga mga Ukrainians na ang naghalin sa pungsod kadungan sang pagkaguba sang mga ciudad kag linibo ang nadulaan sang kabuhi humalin sang nagsugod ang invasion sang Pebrero 24.
Sa Twitter, ginpahayag ni President Volodymyr Zelensky nga gindiskusyunan na ang pagsiguro sang financial stability sang Ukraine kag mga preparasyon para sa post war reconstruction kaupod si International Monetary Fund Managing Director Kristalina Georgieva.
