Padayon pa ang imbestigasyon sa identity sang mga persona nga nagpaarak sang luthang sa fishing boat nagikan sa ciudad sang Victorias.
Sa interview sang Bombo Radyo kay John Rexil Azuelo, kapitan sang fishing boat, kaupod sini sa bangka ang iya utod nga si Ronilo Azuelo, kag sanday Justine Diamante, Joel Vetualla, Alvin Ganelo, kag Rex Dela Cruz.
Suno diri, kahapon, kapin alas- 5:40 sang aga may nakita ini nga gamay nga bangka kag didto may apat ka mga tawo nga nagasakay kun sa diin duha diri ang may uyat nga armas-luthang.
Nakasuksok man ang mga ini sang civilian kag nakabonnet nga may tabon ang nawong.
Suno pa diri, nagaduag sang orange kag puti ang bangka kag may markings nga ‘Gigante’ sa likod kag ‘Carles’ sa atubang.
Isa sa mga lalaki ang naglumpat sa ila nga bangka kag naghigot sang kalat kag sila ang ginhambalan nga yara sila sa sulod sang 12 kilometer sang ila area.
Suno kay Azuelo, isa sa mga lalaki ang naghambal nga mag-upod siya sa ila nga bangka apang wala niya ini ginsapak.
Ginpaandar ni Azuelo ang makina kag ginpaliko ang bangka kag amo na nga nagpalupok sang armas ang isa ka lalaki.
Dugang pa sini, ila ginhingagaw nga batakon ang ila fish net apang sila ang ginpaarakan na sang luthang.
Naigoan ang isa nila kaupod nga si Rex Dela Cruz sa dughan nga gintunaan sang iya kamatayon.
Pahayag ni Azuela, nagsinggit na sila nga may napatay sa ila nga crew kag gilayon man nga gin-utod sang mga lalaki ang kalat kag nalagyo.
Sa karun, napablotter na sa mga kapulisan sa Bantayan, Cebu ang gina-alegar nga strafing incident samtang padayon ang imbestigasyon sa mga identity sang mga suspetsado. Samtang, wala untat nga nagakoordirnar ang Victorias Coast Guard substation sa kapulisan sa Bantayan, Cebu kag Coast Guard Cebu sa imbestigasyon sa nagluntad nga strafing incident.
Sa interview sang Bombo Radyo kay Petty Officer First Class Michael Quebrar, substation commander sang Victorias Coast Guard, wala pa sang identity ang mga suspetsado nga nagpaarak sang luthang sa fishing boat nagikan sa ciudad sang Victorias, kahapon, kapin alas- 5:40 sang aga.
Suno diri, ginahulat na lamang ang pagpauli sang anum ka crew lakip na ang bangkay ni Rex Dela Cruz nga napatay matapos nga maigoan sa dughan.
