Napasakaan na sang sampaw-sampaw nga kaso ang mga suspetsado nga nagpatay kay Negros Oriental Governor Roel Degamo kag walo ka iban pa sang Sabado sang aga.
Suno kay Police Regional Office 7 spokesperson Police Lt. Col. Gerard Pelare nga amo man ang spokesperson sang Special Investigation Task Group Degamo, ang kaso nga multiple murder, multiple frustrated murder kag illegal possession of firearms and explosives ang ginpasaka kaina sang aga.
Ang duha ka una nga kaso ang ginfile sa Provincial Prosecution Office kaina sang aga samtang ang duha ka iban pa ang gindocket sa Bayawan City Prosecutor’s Office kaina sang kaagahon.
Nahibaluan nga yara na sa kustodiya sang mga pulis ang apat ka mga gunmen nga nagpatay kay Degamo samtang napatay naman ang isa matapos nagbato sa mga pulis kag suldado sa Barangay Cansumalig, Bayawan City sang Sabado sang gab-i.
Ang mga arestado ang ginalakipan sang tatlo ka anay miyembro sang Philippine Army nga sanday Sgt. Jorric Labrador; ex-scout ranger Joven Aber sang Barangay Robles, La Castellana, Negros Occidental kag Osmundo Rivero sang Zamboanga City; kag si Benjie Rodriguez sang Misamis Occidental nga lunsay nadakpan sa Barangay Cansumalig, Bayawan City.
Ang mga anay suldado ang naghalin sa serbisyo paagi sa absent without official leave.
