At large gihapon ang mga suspetsado nga nagtiro sa tatlo ka mga lalaki lakip na ang isa ka menor de edad sa Sitio Dresden, Barangay Inolingan, Moises Padilla, Negros Occidental, pasado alas 9:30 sang gab-i sang Hunyo 1.
Sa interview sang Bombo Radyo kay Police Major Randy Babor, hepe sang Moise Padilla Municipal Police Station, nagapahuway-huway sa isa ka kamalig sa isa ka tubuhan ang mga biktima nga sanday Norman Saldo kag bata sini nga menor-de-edad, lunsay mga residente sang Barangay Minoyan, Murcia, Negros Occidental kag Joel Escaner, 41 anyos, residente sang Sitio Tuko, Barangay Inolingan, Moises Padilla.
Apang hinali lang nga nagsulod si Steve Camelo, 19 anyos kag residente man sang nasambit nga lugar kag ang wala pa makilal-an sini nga upod kag ginpangluthang ang mga biktima.
Suno kay Babor, wala pa mahibaluan kun ano nga armas luthang ang gingamit sang mga ini.
Nakaangkon sang igo sa hawak si Saldo samtang naigo naman sa paa si Escaner kag ang menor-de-edad.
Gindala ang mga ini sa Isabela District Hospital agud madapatan sang nagakaigo nga pagbulong.
Samtang, at large naman ang mga suspetsado.
