Yara na sa kustodiya sang Murcia Municipal Police Station ang tatlo ka mga suspetsado nga imbolbado sa rambol kag pagbun-anay nga nagluntad sa Handy’s Restobar, Hacienda Bernabe, Brgy. Salvacion, banwa sang Murcia, kahapon kun sa diin tatlo ang patay lakip ang isa ka pulis kag tatlo ka iban pa ang pilason.
Sa interview sang Bombo Radyo kay Police Major Marc Roel Reclamado, hepe sang Murcia Municipal Police Station, nagpadulong ang tatlo ka miyembro sang 2nd Negros Occidental Provincial Mobile Force Company nga nakabase sa Barangay Dulao, Bago City sa nasambit nga restobar agud mag-inom sang hinali na lang nga may nagluntad nga komosyon sa gwa sang restobar gani nagwa ang mga pulis agud kuntani magtambag apang nadalahig sa gamo ang tatlo ka pulis kag iban pa nga mga lalaki nga nagainom.
Napatay sanday Police Corporal Gabby Castillo sang La Carlota City; Marvin Guardavilla sang La Castellana kag Benedict Maguad sang Brgy. Zone 5, Murcia.
Suno kay Reclamado na-aresto sa follow up operation sang kapulisan ang tatlo ka suspetsado nga lunsay mga residente sang Murcia nga amo sanday Marjune Gallano, Jojie Gallano kag live- in partner sini nga si Ching Jingco nga ginatumod pa kun ano ang partisipasyon sini sa krimen.
Samtang, wala pa sa gihapon nahibaluan kun diin gintago sang suspetsado nga si Marjune ang gingamit sini nga pagpamuno.
Dugang pa ni Reclamado, dala sang mga pulis ang ila mga service firearm apang wala man ini maggamit sa pagtambag sa ginamo.
Apang, padayon pa nga ginahibalo kun accidental firing ang natabo bangod nga may yara sang nabatian nga paglupok kun sa diin nakitaan sang igo sang bala sa wala nga paa ang isa ka pulis.
Nagpadulong naman ang pamilya sang mga biktima sa police station agud mag-file sang kaso batok sa mga suspetsado.
