Nagpatigayon na sang casing ang mga suspek nga nagpatay kay Negros Oriental Governor Roel Degamo kun sa diin nadalahig ang walo ka iban pa, bulan pa lang sang Disyembre sang tinalikdan nga tuig suno sa spokesperson sang Special Investigation Task Group-Degamo sa Police Regional Office 7.
Sa press briefing, ginpahayag ni Special Investigation Task Group (SITG) spokesperson Police Lieutenant Colonel Gerard Ace Pelare, nga ang mga perpetrators ang nagikan sa nagkalain-lain nga lugar kag sila ang nagkilit-anay lang.
Suno kay Pelare, may yara sang nag-abot sa Negros Oriental sa bulan sang Disyembre agud nga magpatigayon sang casing kag surveillance agud nga matumod kun ano klase nga modo sang operasyon ang ila nga igalunsyar para sa pag-atake sa gobernador.
Gindugang man sini ang iban nga perpetrators ang nag-abot sa Negros Oriental duha ukon tatlo ka adlaw antes ang adlaw sang pagpang-atake.
Ginpahayag man sini nga ang mga suspetsado ang nagtinir sa ila nga safe house.
Ginpahayag man sini nga ang mga perpetrator ang may yara sang mahimo nga pilian kun paano sang mga ini patigayunon ang asssination kag nagdesisyon nga ang maayo nga oportunidad agud nga igalunsyar ang pag-atake sa gobernador amo ang Marso 4.
Ginpahayag man sini nga ang mga kapulisan sa karun ang nagatipon sang mga pila pa ka ebidensya agud nga masiguro ang airtight case batok sa suspetsado kalakip na ang mastermind.
Suno pa diri, may yara sila sang 16 ka ginalantaw nga mga suspetsado sa pagpamatay.
Napasaka na ang kaso nga Murder kag frustrated murder batok sa apat ka mga suspek nga ginkilala nga sanday Joric Garido Labrador, Joven Calibjo Javier, Benjie Rodriguez, Osmundo Rojas Rivero, kag 12 John Does sa Tanjay City Regional Trial Court.
Samtang, ang kaso naman nga illegal possession of firearms, ammunition, and explosives ang ginpasaka sa tatlo ka mga indibidwal sa Bayawan City Regional Trial Court.
Suno kay Pelare, ang 16 ka mga suspetsado ang ginlakipan sang napulo ka mga direct participants, samtang ang iban amo ang facilitators, conspirators, kag ang mastermind.
Nahibaluan nga sang Miyerkules, ginpahayag ni Justice Secretary Jesus Crispin Remulla nga malapit nalang matapos kag macase close na ang Degamo case bangud may yara na ang mga ini sang video sang gina-aligar nga mastermind.
