Wala pa mapasakaan sang kaso ang tatlo ka ginaaligar mga suspetsado nga imbulbado sa hazing nga ginkamatay sang 18 anyos nga Grade 10 student sa banwa sang San Enrique sang Setyembre 9.
Sa interview sang Bombo Radyo Bacolod kay P/Lt. Sammy Gasataya, deputy chief sang San Enrique Municipal Police Station, ginahulat nalang sang pamilya nga malubong ang biktima antes pasakaan sang kaso ang mga ginaaligar suspetsado.
Madumduman nga ang estudyante ang nagselebrar sang ika-18 nga kaadlawan sang Setyembre 3 kun sa diin nagtambong man diri ang tatlo ka mga nagarecruit sa iya sa fraternity.
Ginpakigbahin man sang iloy sa mga kapulisan nga nag-inom pa ang mga ini alas-10:00 sang gab-i tubtob na sang alas-12:00 sang tungang gab-i.
Alas-12:00 gin-blindfold ini sang mga abyan kag gindala sa wala mahibaluan nga lugar kag didto na ginpatigayon ang hazing apang wala na makahibalo ang iya mga ginikanan.
Pagkasunod nga adlaw, natalupangdan nila nga daw may lain sa paglakat sang ila anak apang wala na nila ini ginpadalman pa.
Tubtob sa nagreklamo na ini sang Setyembre 8 sa sakit nga iya ginabatyag kag ini ang ginahilanat na.
Bangod sa pagpinsar nga normal lang ini nga hilanat, ginhot compress lang nila ang biktima.
Apang sang kaagahon sang Setyembre 9, naglala na ang sitwasyon sang estudyante kag didto naman sini gintuad nga siya ang ginhazing.
Naggwa sa post mortem examination nga ang biktima ang nag-angkon sang hematoma sa buli, samtang ang dugo naman ang nagdangat na sa iya nga kidney.
