BACOLOD CITY-Ginpasakaan na sang kaso nga robbery ang tatlo sa napulo tubtob onse ka mga suspetsado nga nagpangawat sa duha ka jewelry stores sa sulod sang isa ka mall sa ciudad sang Bacolod sang Agosto 7.
Suno kay Bacolod City Police Office (BCPO) Director Police Colonel Henry Biñas, Agosto 13 sang ila ginpasakaan sang kaso ang mga suspetsado nga sanday Marlon Parojinog, Philip Bonn Rabanes kag Kenneth Bonon nga lunsay residente sang Ozamis City, Misamis Oriental.
Si Parojinog ang ginatudlo nga lider sang grupo.
Suno kay Biñas, planado sang grupo ang pag-atake sa F and C kag Haoling jewelry stores sa Gaisano Grand Mall sa Brgy. Sincang Airport.
Nagaguwa man sa imbestigasyon nga gikan lamang sa kaingod nga mga rehiyon ang grupo kag una nga nag-abot sa northern Negros Occidental kag naguwa naman sa southern portion matapos ang ila pag-atake.
Isa sa ginalantaw nga rason sang city director sa pag-atake sa probinsiya sang grupo ni Parojinog ang masupog nga kampanya sang gobyerno batok sa iligal nga druga.
Sa nahibaluan nga kilala ang apelyido nga Parojinog sa isyu sang iligal nga druga sa Ozamis City kag suno kay Biñas, nagsaylo sa pagpanghold-up ang mga ini bangud sang hugot nga drug campaign.
Samtang ginpaguwa sang Bacolod police ang litrato sang mga suspetsado bangud ila na-monitor nga nagaplano naman ang grupo nga mag-atake sa probinsiya sang Cebu.
Madumduman nga nagdangat sa P4.5 million nga balor sang alahas ang nataban sang mga suspetsado gikan sa duha ka jewelry stores.
