Nagpahanumdom si Councilor Renecito Novero, chairman sang Committee on Education sa Sangguniang Panlungsod sa Bacolod nga may yara sang City Ordinance No. 356 nga ginpasar sadtong Enero 15, 2004 nga naga-regulate sang noise pollution sa ciudad.
Ini ang kasunod sa mando sang Department of the Interior and Local Government (DILG) sang Miyerkules nga dapat magpasar sang ordinansa ang mga LGU nga naga-ban sa pagpatukar sang videoke machines kag iban pa nga mga maka-disturbo nga huni samtang nagapatigayon sang online classes.
Sa interview sang Bombo Radyo Bacolod kay Novero, nagpanugyan ini sa publiko nga likawan lang anay ang pagpatukar sang mga videoke ukon karaoke machines ukon butangan ini sang limitasyon bangud tanan karon nga mga estudyante ang nagapaidalom sa blended learning system sa tunga-tunga sang coronavirus disease 2019 (COVID-19) pandemic.
Suno kay Novero, kuntani magkooperar kag magbuligay lang ang tanan para sa pagtuon sang mga kabataan.
Gin-athag man sang konsehal nga apisar alas-10:00 sa gab-i tubtob alas-4:00 sa kaagahon ang curfew hours sa Bacolod, indi gihapon pwede makapagusto patukar sang videoke kun indi pa curfew.
Liwat naman sini nga ginpahanumdom nga sa idalom sang City Ordinance No. 356, magapangatubang sa P500-P3,000 nga multa ang persona nga magalapas sa ordinansa samtang P1,000-P5,000 naman ang mga establisyemento nga magabayolar.
Kun masobra tatlo ka bes na nga naglapas, sarang nga mapriso sa sulod sang 30 ka adlaw tubtob isa ka tuig ang amo nga persona kag pwede pa mapasirado ang establisyemento kag makumpiskar ang karaoke machine.
