Kadungan sa pagbubo sang ulan, nagbubo naman sang papremyo sa studio sang Bombo Radyo Bacolod para sa pito ka entry senders sa Enhanced Swerte sa Palengke sang Bombo Radyo kag Star FM matapos nga magdaog sa ikatatlo nga weekly draw sang Sabado.
Tuman gid ang pagpasalamat sang 3rd prize winner nga si Zenia Dela Cruz sang Barangay Taloc, Bago City matapos magbaton sang P3,000 nga cash kag P500 nga balor sang gift pack.
Suno sa iya, ibakal niya sang gatas kag diaper sang iya nga bata ang kwarta nga iya nadaugan.
Samtang, ibakal naman sang bugas kag sud-an sang 2nd prize winner nga si Maricor Lastimosa, 32-anyos sang Purok Mabinuligon, Barangay Pahanocoy, Bacolod City ang P4,000 nga cash nga iya nabaton.
Magluwas diri, nagbaton man siya sang gift pack nga balor P500.
Gamiton naman sang 1st prize winner nga si Shiela Ansab sang Cadiz City, Negros Occidental para sa mga kinahanglanon sa sulod sang ila nga balay ang P5,000 nga iya nadaugan.
Tuman man ang kalipay sini sa gift pack nga iya nabaton nga nagabalor sang P500.
Nagpang-agda naman ang major prize winner sa Online Activation sang Enhanced Swerte sa Palengke nga si Mauro Martir sang Martir Store sang NHA Pahanocoy, Bacolod City.
Suno kay Martir, idugang niya para sa iya nga tyangge ang P3,000 nga cash nga iya nabaton.
Magluwas diri, nagpauli man ini nga may bitbit nga balor P1,000 nga gift pack.
Magluwas kay Martir, tatlo naman ang napilian nga nagbaton sang consolation prizes nga nagabalor P1,500 nga cash kag balor P1,000 nga gift pack.
Nagbaton sang consolation prizes sa paindis-indis sa pagdesinyo sang sari-sari store gamit ang mga proof of purchase amo ang Cecilia Store ni Ma. Cecilia Roda Polidario sang Block 13 lot 18, Sugar Valley, Talisay City, Negros Occidental; Tita’s Store ni Tita Salanap sang 33 Alunan Baybay, Bacolod City kag Three Brothers Store ni Maricel Compliza sang Purok Malipayon, Barangay 35, Bacolod City.
