Nabaton na sang Regional Prize kag mga Guaranteed Prize Winners sang nakaligad nga Buena Mano Salvo Year 18 Promo sang Bombo Radyo kag Star FM, ang ila nga mga premyo kaina sang aga.
Tuman ang kalipay sang Regional Prize Winner nga si Danilo Palacios, 69 anyos sang Purok Halandumon, Barangay Banago, Bacolod City sang mabatun ang P50,000 nga premyo.
Dako gid ang pagpasalamat sini sa Ginoo sa bugay bangod ini ang makabayad na sang utang kag makabakal sang bulong sa mga balatian.
Siya ang nagasuprer sang pneumonia, diabetes kag highblood kag may nagatubo man nga bukol sa iya likod kag liog.
Pinaagi sa nadag-an, ipakay-o man sini ang nagatakilid na niya nga payag-payag.
Si Palacios, nga balo na sa asawa kag wala sang bata, ang nagaisahanon lamang nga nagapuyo sa iya nga balay.
Dako man ang pagpasalamat sang mga guaranteed prize winners kaangay ni Julie Magsilom, sang Barangay San Miguel, Murcia nga nagdaog sang P15,000 cash.
Ang nadag-an ang ibakal sini sang maintenance nga bulong, bugas kag mga kinahanglanon sa sulod sang balay.
Dako man ang pagpasalamat sini sa surf powder nga nangin liyabi sang iya kadalag-an sa promo.
Dako naman nga bulig para sa retirado nga baker ang pagdaog bilang 2nd guaranteed prize winner sa balor nga P10,000.
Si Reymundo Dela Peña, sang Abada Rellocation Site, Barangay Vista Alegre, Bacolod City, duha lang sila sang iya misis sa ila nga balay bangod may pamilya na ang ila kabataan.
Makabulig naman sa pabalod sa mga estudyante kag inugbakal sang bugas ang P5,000 nga nadag-an sang 3rd guaranteed prize winner nga si Eddie Rose Jaudalso sang Barangay 35, Bacolod City.
Dako ang pagpasalamat sini sa Bombo Radyo kag Star FM sa premyo nga nabaton.
