Tuman ang kalipay sang mga tagdaog sa grand draw sang One Two Panalo Part 20 Promo sang Bombo Radyo kag Star FM matapos mabaton ang ila nga premyo kaina sang aga.
Tuman ang pagpasalamat sang first prize winner bangud may gamiton na ini sa pag-eskwela bangud sa nadag-an nga P15,000.00.
Suno kay Shady Ann Sayon sang Prk. Kagaykay, Brgy. 2, Bacolod City, naggamit sang proof of purchase nga R. Florete Pawnshop kag Jewelry nga siya mismo ang nakabati nga nalawagan ini bilang tagdaog sang first prize winner.
Ihatag man sini sa iya lola ang nadag-an nga kwarta kag gamiton ang iban sa iya pag-eskwela .
Ang mga winners ang lunsay nagpasalamat sa Bombo Radyo kag mga sponsors sang 1 2 Panalo Part 20 promo.
Nagpangagda man ang mga ini sa iban nga tagpalamati nga magpasakop sa tion nga may promo nga ginapatigayon ang Bombo Radyo agud sila ang makadaug man sang cash prizes kasubong nila.
Nagpasalamat naman si Rona B. Villavert sang 22T Cordova Avenue, Brgy. 18, Bacolod City nga may proof purchase nga silver swan, nga ginpahibalo siya ni Punong Barangay Madeline Diaz nga siya ang nagdaog sa Grand Draw sang 1-2 Panalo Promo.
Suno kay Villavert wala siya nakabati sang siya ang ginlawag bangud nagabantay ini sang iya order nga mag-abot nga gamiton sa ila inasalan gani ginpahibalo lamang siya ni Punong Barangay Diaz.
Indi pa ini kuntani magpati nga P10,000.00 ang iya nadag-an.
Ginpahayag man sini nga dako na nga bulig ang P10 mil nga nabaton sini para sa ila pang-adlaw adlaw kag sa ila nga inasalan.
Nagapanghugas naman sang pinggan si Sophiemar Lapu-os sang Purok. Sto. Domingo, B rgy. Handumanan, Bacolod City sang ini ang nalawagan bilang 3rd Prize winner sa Grand Draw sang 1 2 Panalo Promo Part 20 sang December 25, 2021 kag siya ang naggamit sang proof of purchase nga rexona.
Suno kay Lapu-os sang nabatian sini nga siya ang nagdaog gilayon man siya nga nagtumbo-tumbo sa kalipay.
Suno diri dako na ang mabulig sang nabaton sini nga P5,000 nga cash para sa kinahanglanon sa ila balay kag sa ila mga kabataan.
Ginpahayag man sini nga ang sobra sa kwarta nga iya nadag-an ang ibakal niya sang mga produkto nga mahimo gamiton nga proof of purchase para sa palaabuton nga promo sang Bombo Radyo.
