Nagdala naman ang team sang Bombo Radyo kag Star FM Bacolod sang kasadyahan sa mga pumuluyo sang ciudad sang Bago kadungan sang ikaduha nga market draw sang Enhanced Swerte sa Palengke Promo sa Bago City Public Market kaina sang aga.
Anom ka mga tagpasakop ang nagdaog sang cash kag gift pack samtang nag-enjoy man ang mga nagapaninda sa videoke challenge kag mga parlor games nga may yara man sang premyo.
Ang anom ka maswerte nga tagdaog sang P500 nga cash kag P500 nga balor sang gift pack amo sanday Mary Faith Dalmino sang Purok Malipayon, Bacolod City; Gemma Felomino sang Barangay Crossing Pulupandan; Rommel Pacto sang Barangay Taloc, Bago City; Carmen Valero sang Barangay Balingasag, Bago City; Aron Damisaran sang Barangay Poblacion, Bago City; kag Marilou Barte sang Purok San Roque II, Barangay Handumanan, Bacolod City.
Sa interview kay Marilou Barte, tuman ini ka malipayon bangud siya ang blessed sa iya nga pagdaog.
Si Barte ang nagbiya sa ila balay alas-5:30 kaina sang kaagahon agud nga magkadto sa Bago City Public Market.
Ang P500 ang ibakal niya sang bugas kag proof of purchase agud nga makahulog sang dugang nga entries tubtub sa grand draw sang promo.
Suno diri, wala ini nagapaulihi sa pagpasakop sa mga promo sang Bombo Radyo bangud dako ang bulig sini sa iya nga inugbakal sang kinahanglanon sa sulod sang balay.
