Kapin 30 na ka indibidwal ang nakig-angot sa opisina sang National Bureau of Investigation (NBI) sa syudad sang Bacolod matapos nga mabiktima sang rice investment scam.
Sa interview sang Bombo Radyo Bacolod kay NBI Bacolod Office Head Atty. Renoir Baldovino, ginpahayag sini nga masobra na sa P30 million ang nakuha sang mga suspestsado nga ginkilala kanday Jennifer Nierves kag Krizia Rhea Gonzaga sang Bacolod sa 30 lamang ka indibidwal.
Suno kay Baldovino, pyramiding ang natabo sa ginaalegar nga rice investment scam kag ang biktima ang nangin suspetsado man matapos nga magrecruit man ini sang iban nga tawo agud nga mag-invest tubtob nga nagdamo na sila nga nag-invest.
Natalana na nga pasakaan sang kaso sa prosecutor’s office ang mga suspetsado matapos nga ginreklamo sang una nga batch nga ginbug-usan sang lima ka tagreklamo.
Magapangatubang ang mga suspetsado sang kaso nga large scale estafa bangud indi ini makasulod sa kategorya sang syndicated estafa bangud duha lang ang principal suspect.
