Regular ang paglibot sang mga Barangay Tanod sa Barangay Singcang-Airport kasunod sang report tuhoy sa mga kabataan nga nasiplatan nga nagasinghot sang rugby.
Sa interview sang Bombo Radyo Bacolod kay Punong Barangay Caesar Distrito, ang mga Barangay Tanod ang nagaroving sa pagsikop sang mga menor de edad nga yara sa dalanon partikular na sa gwa sang mga drive thru sang mga fast food restaurants.
Iban sa mga ini ang mga badjao kag may ara man sang lokal apang kalabanan ang indi man residente sang Barangay Singcang.
Suno sa Punong Barangay 20 lamang ang ila Barangay Tanod kag ini ang ginarotation pa, gani indi gid masikop ang tanan nga kabataan.
Apang sila ang masami makadakop sang tatlo tubtob pito ka kabataan sa paglibot kaupod sa social worker kag kapulisan.
Suno kay Distrito, indi na masurrender sa Social Development Center (SDC) indi kaangay sadto.
Ini bangod sa bag-o nga pagsulundan, ang madakpan nga kabataan ang dal-on sa Barangay Hall kag icontact ang pamilya.
Apang madamo sa mga ini ang indi mag-ako kun sin-o ang ila ginikanan kag kalabanan sa madakpan ang indi man residente sang Barangay Singcang-Airport.
Gani sila ang nagapangita pa sang mahimo makakilala sa mga kabataan.
Kun matumod ang mga ginikanan ang mga ini ang ginapaidalom man sa briefing kag ginapahanumdoman sa ila responsibilidad kag liabilidad sa pagpatumbaya sa ila mga kabataan nga magliyong sa dalanon.
Suno kay Distrito, mabudlay ang pagtapna sa mga ini ilabi na nga ginlipot lamang sang mga kabataan ang mga Brgy Tanod kag sila ang indi man mapariso bangod minor.
