Ginapaabot nga magadamo ang masulod nga mga specimen samples sa mga laboratoryo sa probinsya karun nga nagsulod na ang mga migrant workers.
Suno kay provincial administrator Atty. Rayfrando Diaz, nag-abot ang mga migrant workers sang Huwebes nga nagikan pa sa Antique kag temporaryo nga nakahunong sa tagsa ka mga quarters.
Ginpaidalom naman ang mga ini sa swab test kag kun magpositibo, sila ang igasaylo sa quarantine sites samtang ang mga negatibo naman ang sarang na nga makatrabaho sa kampo.
Samtang ginalauman pa ang magaabot nga migrant workers nga magagikan naman sa Antique kag sa iban pa nga mga lugar sa Western Visayas, kasubong man sa Negros Oriental.
Samtang limitado naman ang ginapasulod santo sa kapasidad sang probinsya sa testing, transport kag quarantine.
Ginalauman man nga magasugod sa pag-abot ang mga locally stranded individual (LSI) kag autorized person outside residence (APOR) nagikan sa Manila.
Gina-ekspektar naman nga yara sa 155 tubtob 195 ang mga persona nga magaabot sa mga airport sa kada adlaw nga magatuga sa pagtaas sang igatest sang laboratoryo.
Sa karun, naganubo naman ang kaso sang COVID-19 sa probinsya indi kaangay sang tinalikdan nga nagadangat sa isa ka gatos.
