Mahimo na nga makuha ang fuel subsidy sang kapin 30 ka Taxi driver sa Talisay City sa Land Transportation Franchising and Regulatory Board Region 6.
Madumduman nga nagdangop sa Ipa-Bombo Ta segment sang Bombo Radyo Bacolod ang mga taxi drivers sa idalom sang Christine Taxi agud magreklamo bangod wala pagid makabatun humalin sang gin-implementar ang pagpanghatag sang fuel subsidy sang LTFRB.
Bangod wala pa sang personnel sa idalom ni LTFRB-Negros Island Region Director Atty Gerry Llena, gani gintugyan sini sa mga may reklamo nga magdangop na lamang sa Bombo Radyo Bacolod agud matipon ang listahan kag iya matsekyar ang status sang ayuda.
Nasumiter sang Huwebes sang aga sang Bombo Radyo ang mga dokumento nga natipon gikan sa kapin 30 ka Taxi drivers, samtang pagkagab-i gilayon man nga ginkumpirmar ni Llena nga sarang na nga makuha ang ayuda.
Suno diri, sa iya imbestigasyon nakita sini nga may gamay nga miscommunication sa listing sang operator sa mga driver.
Panugyan ni Llena nga kuhaon na lamang sang operator sa LTFRB Region 6 office sa Iloilo ang ayuda, apang ini ang mahimo man magpadala sang representative nga padal-an na lamang sini sang authorization letter nga may Special Power of Attorney (SPA).
Suno diri, magcontact na lamang sa iya kun yara na sa LTFRB Region 6 office, agud makacontact ini nga yara na ang magakuha sang ayuda.
Samtang pasalig man sini nga imonitor niya first-hand kun mahatag gid man sang operator ang fuel subsidy sa mga taxi drivers.
Sa Martes na plano nga kuhaon sang operator sang Christine Taxi ang fuel subsidy gikan sa LTFRB Region 6 para sa ila kapin 30 nga taxi drivers.
Biyernes pa lamang, sarang na nga makuha ang ayuda apang agud indi na ma-alang alang sa oras, ginpanugyan nalang ni Llena nga ini ang kuhaon sa Lunes.
Apang sa umpisa, nagduda pa ang operator kag nagpahayag nga siya ang wala man nacontact nga makakuha na sang ayuda.
Gintuyo ni Panibawan nga magpangayo nalang sang authorization letter nga siya na lamang ang magakuha para sa tanan nila nga drivers bangod sa alegasyon nga ‘mala-gana’ ang ila nga operator.
Sa ulihi, nagpahayag man ang operator nga siya na lamang ang magakuha sang ayuda sa Martes.
