Nagsugot na ang mga tenants sa Manokan Country nga sila ang masaylo sa temporaryo nga pwesto sa terminal hub sang SM City Bacolod.
Kaina sang aga, nagpadulong sa Bacolod City Mayor’s Office ang mga tenants agud makasugilanon sa Mayor Alfredo ‘Albee’ Benitez.
Sa interview sang Bombo Radyo Bacolod kay Councilor Celia Flor, chairperson sang Committee on Markets sa Sangguniang Panlungsod, kasunod sang paghinun-anon nagpatigayon sang site visit ang alkalde sa pwesto nga sayluhan sang mga vendors.
Ang mga ini ang sarang na nga makasaylo sa tion nga matapos na ang pagtransfer sang connection sang tubig kag kuryente kasubong ang pagbutang sang exhaust hood para sa inasalan.
Subong nga hapon, ginpapalos naman ang yellow caution line sa Manokan Country.
Bangod 16 ka stalls lamang ang available, gin-ayo man sang mga ini sa ciudad nga I-extend sa parking area agud maakumodar ang 24 ka mga tenants.
Buksan man ang Fr. Ferrero Street kag butangan sang canopy nga amo ang mangin plastaran sang mga customer kun gutok na sa limitado nga pwesto sang kada stall.
Apang ang mangin prayoridad sa stalls sa tion nga matapos na ang developments sa Manokan Country amo ang mga tenants nga updated sa pagbayad sang renta samtang ang mga may arrears ang ivalidate pa.
Sa inisyal, gin-ayo sang mga ini nga mawave ang surcharges, apang paathag ni Flor nga tubtob sa lima ka tuig lamang ang ginapahanugutan sa City Government nga sarang mawave.
Ang mahimo mahatagan sang pwesto sa bag-o nga Manokan Country amo lamang ang makatapos sa pagbayad sang ila arrears makaligad sang 18 ka bulan nga construction.
Madumduman nga wala naman sang renta ang mga vendors sa temporaryo nga pwesto kag tubig kag kuryente na lamang ang balayran.
