Wala na sang reklamo ang mga tenants sa Manokan Country kag nakahanda na sa pagsaylo sa temporaryo nga pwesto.
Sa interview sang Bombo Radyo Bacolod kay Councilor Celia Flor, chairperson sang Committee on Markets sa Sangguniang Panlungsod, kahapon may apat ka mga tenants nga boluntaryo nga nag-amat-amat demolish sang ila stalls kag ini ang nadugangan pa subong nga adlaw.
Suno diri, ang mga tenants sa 21 ka mga stalls na mismo ang nagademolish sang ila pwesto agud makuha ang mga materyales nga sarang pa mapuslan kag sila ang ginabuligan man sang City Engineer’s Office.
Sa karun wala naman sila sang nabatun nga reklamo.
Paathag ni Flor nga sang tinalikdan nagrequest sang roll-up doors ang mga tenants para sa seguridad sang ila temporaryo nga pwesto kag ini ang amat-amat naman nga ginatakod.
Magluwas diri, may lima ka tents nga ginhamtang sa atubang sang Temporary Manokan Country samtang may walo naman ka tent sa daan nga Manokan Country nga may size nga 10 feet by 20 feet, kun sa diin ang isa ka tent ang sarang mapwestuhan sang lamesa kag mga bangko sang duha ka mga tenants.
Apang iban sa mga tenants ang nagpahayag mismo nga nagakaigo na sa ila ang pwesto sa Temporary Manokan Country bangod madamo naman sang customers.
Panawagan sang konsehal nga kun luyag magkaon sang inasal nga manok, mas maayo nga sa Temporary Manokan Country na lamang magkadto.
Pasalig sini nga ang pwesto ang malimpyo, may CR kag may ulugasan sang kamot.
Sa pihak nga bahin, sa 3,338 ka na-issue nga food voucher, 2,433 lamang ang naclaim sa Temporary Manokan Country.
Nahibaluan nga ang food voucher ang may validity deadline nga tubtob lamang sang Pebrero 16.
Paathag ni Flor nga isettle nila una ang balayran sang ciudad sa mga naclaim nga food vouchers kag kasunod nga diskusyonan kun iga-extend ang validity sang masobra 900 nga wala maclaim.
