Personal nga ginpadulungan ni La Castellana Mayor Rhummyla Nicor-Manguilimutan ang lugar nga pagahimuon nga tent city sa Sitio Bingig, Brgy. 3, Himamaylan City, kahapon sang hapon, Enero 12.
Ang tent city nga ipahamtang ang kabahin sang pagpanghanda sang gobyerno para sa mga pumuluyo nga yara sa guwa sang 6-kilometer danger zone sang bulkan Kanlaon pananglitan nga magsaka ini sa Alert Level 4.
Ang mga tents nga ginpadala sang Office of Civil Defense Central Office ang amat-amat naman nga gin-install, kahapon.
Mahimo naman nga magadangat sa 1, 911 ka mga pamilya ang ma-akomodar sa tent city.
Una na nga ginpahayag ni Office of the Civil Defense (OCD) Negros Island Region, Regional Director Donato Sermeno II, nga may yara sang 1, 350 tanan ka mga tents halin sa Central Office sang OCD ang nag-abot sa probinsya kag ini ang una ginbutang sa covered court sang Barangay Antipolo, Pontevedra, Negros Occidental.
