Ginpahayag sang residente malapit sa ginluntaran sang pagpangluthang sa dismissed nga pulis sa Purok Michelle, Barangay Dulao, Bago City nga may nakaligad na nga kinagamo sa manokan nga ginadumalahan sini.
Nahibaluan nga napatay si anay Police Officer 2 Reynaldo Bernil, residente sang Brgy Pacol, Bago City nga sa karun manager sa manokan sa lugar, matapos ginpaarakan sang luthang sang ginabanta lima ka persona gamit ang high powered firearms.
Sa inisyal nga impormasyon sang Bombo News Team, may nakita nga hilux nga ginalantaw ginasakyan sang mga suspect.
Sa interview sang Bombo Radyo Bacolod kay Alyas Mike, sang Disyembre 2024 antes ang New Year, may kinagamo sa mga gwardiya sa sulod sang Manokan kag may-ara sang nagpalupok.
Pahayag sini nga wala pa mag-isa ka tuig sang umpisa nga nagtrabaho sa manokan si Bernil kag ini ang masami gid nga nagapamugno.
Suno diri, stay-in ang anay pulis sa manokan kag kaina gindul-ong sini ang iya bata nga babayi sa eskwelahan sa Barangay Pacol, Bago City kag sa pagbalik didto na ini ginpaarakan sang luthang.
Pahayag sang mga ini nga may kapin 10 nga mga tinawo si Bernil sa manokan.
Samtang, ginpakigbahin man ni Mike nga duha sadto ang tag-iya sang manokan tubtob nga nagkasuhay gani sa karun isa na lamang ang amo sini.
Apang ang balay sa sulod sang compound ang ginpatukod sang napierde sa kaso.
Wala pa mahibaluan ang rasun sang pag-ilinaway sang Disyembre apang sila ang nakabati sang lupok.
