Magapatigayon sang asod-asod nga rally-protesta kag untat-byahe ang mga unconsolidated traditional jeepneys sa Bacolod City sa masunod nga semana.
Sa interview sang Bombo Radyo Bacolod kay Bacolod Alliance for Commuters, Operators and Drivers Incorporated (BACOD president Rudy Catedral, nagpagwa sang resolution no. 694 ang Sangguniang Panlungsod, sila ang naka-atubang na kay Bacolod City Mayor Alfredo “Albee” Benitez kag nagpadulong sa Land Transportation Franchising and Regulatory Board (LTFRB) Region 6 kag Central Office.
Apang sa ulihi ang ila request ang ginapasa-pasa lamang kag kutob lang sa promisa ang ginpahayag ni Benitez nga makaparenew sang prangkisa ang mga traditional jeepneys.
Suno kay Catedral, sa karun masobra isa ka libo nga mga traditional jeepneys ang nagabyahe sa dalanon nga wala sang papelis, wala rehistro, wala prangkisa kag wala sang insurance nga tuman ka makatalagam.
Nakaligad nga adlaw, nagsugilanon man si Kabakod Negros Transport Coalition Incorporated (KNETCO) president Lilian Sembrano sa City Licensing Office, kag sila ang ginpasa kay Councilor Al Victor Espino, nga amo ang chairperson sa Committee on Transportation and Traffic.
Apang suno sa konsehal wala na sila sang mahimo bangod LTFRB kag Department of Transportation (DOTr) lamang ang makadesisyon.
Panindugan ni Catedral nga wala nagakaigo ang implementasyon sang Public Utility Vehicle Modernization Program sa Bacolod City bangod masobra linibo ang madula nga pampubliko nga transportasyon sa dalan.
Bangod sa kakulang sang tikang sang ciudad, sila ang nagrequest na sang permit sa pagpatigayon sang rally-protesta kag untat-byahe.
Ginalantaw sini nga kalakip ang highlight sang Masskara Festival sa Oktubre 27 sa ila nga patigayunan sang aktibidad.
Panindugan ni Catedral nga sila ang magaprotesta may ihatag man nga permit ukon wala.
