Nagpatigayon sang rally-protesta ang grupo sang traditional jeepneys sa ciudad sang Bacolod kaina sang aga.
Sa interview sang Bombo Radyo Bacolod kay Bacolod Alliance for Commuters, Operators and Drivers Inc. President Rudy Catedral, sila ang nagtipon sa Vicente-Yap Street, Barangay Singcang Airport agud ipakita nga dapat ginpirmahan ni President Ferdinand ‘Bongbong’ Marcos Jr. ang Senate Resolution No. 1096 nga nagapanawagan sang temporaryo nga pagsuspendi sang Public Utility Vehicle (PUV) Modernization Program.
Suno diri, sila ang wala nagapanawagan nga untaton ang programa, kundi temporaryo lamang nga isuspend agud mas matun-an pa ang mga kapalpakan sa pagpatuman sang nasambit nga programa.
Nagapanindugan man ini nga indi matuod ang ginapatihan sang local government unit nga 80 porsyento na ang consolidated jeepneys sa Bacolod, bangod sa ila record yara pa lamang ini sa 27 porsyento.
Apisar nga 70 porsyento palang sang ila nga miyembro ang nag-upod sa rally-protest nga yara sa idalom sang MANIBELA, nabatyagan na sang commuters ang problema sa masakyan kun sa diin madamo sang estudyante kag empleyado nga nalate.
Sila ang nagpatigayon man sang caravan alas-11:00 kaina sang aga kasunod sang panawagan ni MANIBELA Chairman Mar Valbuena.
Suno diri, bwas may press conference man ang PISTON, kag sila ang willing gid mag-upod inkaso imbetahan.
Ginalantaw ni Catedral nga sa Miyerkules, magahugpong ang tanan nga unconsolidated traditional jeepneys sa idalum sang PISTON kag MANIBELA kag dulungan nga magapatigayon sang rally-protesta.
Pinaagi sini, makita sang gobyerno nga indi pa supisyente ang numero sang mga consolidated traditional jeepneys, kag ang mga ini ang wala sang ikasarang sa pagcater sang riding public.
