Nagfile sang counter charges ang mga lideres sang transport groups nga gin-aresto kahapon kasunod sang komosyon sa ginpatigayon nga rally protesta sa Dalan Lacson.
Sa interview sang Bombo Radyo Bacolod kay Kabakod Negros Transport Coalition Incorporated (KNETCO) President Lilian Sembrano, aminado ini nga sila ang wala sang permit sa pagpatigayon sang rally apang sila ang nagsunod man sa panugyan nga isa lamang ka lane ang okupahon.
Indi man sini mabasol ang nangin reaksyon sang mga miyembro nga nagpamungkoy sang bato kag botelya nga nakuha sa constuction site sa ila likod matapos ang mga ini ginbombahan sang tubig.
Panindugan ni Sembrano nga malinong ang ila rally kag ang kapulisan amo ang nagapangharras.
Aminado man ini nga sila ang boluntaryo man nga magapaaresto apang ginakwestyon sini kun ngaa sila ang ginposasan kag wala ginbasahan sang Miranda rights.
Suno diri, wala ini nagsugot nga isulod sa Bacolod Police Station 2 tubtob wala maathag kun ano ang rasun sa pagdakop sa ila, apang madugay lamang antes makasabat ang pulis nga nagpahayag nga bangod sa ‘disobedience to authority’.
Samtang ginpilit man sang kapulisan nga mafile ang kaso kun sa diin sila ang gin-inquest Bacolod Hall of Justice sa tunga sang kagab-ihon, nga nagresulta man agud lima sa anom ka gindakop ang nakapyansa.
Sila nga lima ang may pyansa nga P3,510 kada isa bangod sa disobedience to authority, illegal act of assembly kag bayolasyon sa no permit no rally policy.
Samtang ang isa naman ang may pyansa nga P36,000 bangod sa assault, bangod sa pagbato sa kapulisan matapos nga ini ang nasakam sang pagbomba sang tubig.
Panindugan ni Sembrano nga ginapakigbato lamang nila ang ila nga palangabuhian, sa baylo sila ang nagpangatubang sang harrassment, police brutality kag illegal arrest gikan sa mga kapulisan nga kuntani amo ang magahatag proteksyon sa ila.
