Posible nga dakpon kag pasakaan sang kaso nga grave coercion ang mga tricycle drivers nga magbalabag sa dry run sang electric jeepneys sa Barangay Vista Alegre, Bacolod City subong nga adlaw.
Kahapon, wala natigayon ang dry run sang apat ka unit sang e-jeepney bangod sa pagmalabag sang mga tricycle drivers.
Suno kay Bacolod City Legal Officer Atty. Romeo Carlos Ting Jr., may yara sang special permit ang e-jeepneys sa pagbyahe sa ruta para sa test run.
Suno kay Ting, kalabanan pa sa mga nagabyahe didto ang wala sang permit kag ang ini nga dry run ang ginduso ni Bacolod City Mayor Alfredo Albee Benitez gani sila ang mangdakop sa magabalabag.
Subong nga adlaw Mayo 16 tubtob Mayo 19, liwat nga ipatigayon ang dry run sang apat ka units, alas- 9:00 sang aga tubtob alas- 4:00 sang hapon.
Samtang, nagpanindugan naman ang presidente sang ARVISTODA nga sila sa gihapon ang magapamalabag sa byahe sang e-jeepney.
Suno kay Carlito Ranamo, ila lamang ginapanindugan ang kinamatarong sang asosasyon bangod wala man sila sang may ginlapas nga layi.
Nagpanawagan naman ang mga commuters sa Barangay Vista Alegre, nga kuntani ugyonan na lamang sang mga trcicycle drivers ang pagbyahe sang e-jeepney.
Suno kay Leonora Moralde, nangayo sila sang bulig kay Mayor Albee Benitez bangod nga wala sang ruta sang jeep sa ila lugar nga nagapabudlay sang pagbyahe.
