350 ka mga tricycle drivers sa idalum sang Tricycle Operators and Drivers Association of Handumanan Inc. ang wala nagbyahe subong nga adlaw agud mapalab-ot sa Bbrangay officials kag Bacolod Traffic Authority Office ang problema batok sa byahe sang e-bike kag colorum tricycle.
Sa interview sang Bombo Radyo kay Ricky Duragos, PIO sang TODAH, liwat na naman sila nag-untat sang byahe bangod nga tubtob sa karun, wala sang tikang nga nahatag ang barangay sa illegal nga pagbyahe sang colorum nga tricycle kag e-bike.
Suno diri, indi insakto nga sila nagagasto kag nagaproseso sang mga kinahanglan agud nga makabyahe sang legal kag husto apang wala sang proteksyon ang ila palangabuhian.
Nagadangat lamang sa 200 tubtob 300 pesos ang ma-income sang mga drivers nga suno kay Duragos husto lang nila ipagasolina.
Dako ang epekto kag mabudlay na gid para sa ila ang amo nga sitwasyon sa pagbyahe, gani nagapangayo ang mga drayber nga sila hatagan sang solusyon sang Barangay kag indi puro promiso lang.
Pahayag ni Duragos sa bulan sang Marso apisar nga nagpadulong didto ang Bacolod Traffic Authority Office para magdakop sang mga nagabyahe sang illegal, wala pa ma isahan ka oras nag-pull out naman ang mga ini.
Kasubong man nga problema man sa karun sang mga drayber ang pagbyahe sang mga modernized mini bus nga daw haluson na lang sila makakuha sang pasahero gina-agaw pa gid sang mga ini.
Panawagan ni Duragos nga tani mahatagan na sila sang solusyon bangod nga makaluluoy ang mga tricycle drivers nga nagabyahe sang legal.
Sa interview naman sang Bombo Radyo kay Punong Barangay Ricardo Danoy, wala siya sang ideya kun ngaa nag-untat sang pagbyahe sang tricycle drivers.
Tinalikdan nga adlaw suno sa iya, nagpadulong man sa Handumanan ang mga enforcers sang Bacolod Traffic Authority Office agud nga mangdakop.
Aminado si Danoy nga indi mapunggan ang mga nagabyahe sang e-bike bangud palangabuhian nila ini kag lunsay man sila taga-Barangay Handumanan, basta may nagakaigo lang sila nga papeles.
Suno diri, indi maalarma ang Barangay Handumanan kun mag-untat sa pagbyahe ang TODA Handumanan bangud may iban pa man nga asosasyon nga nagabyahe.
