Ginpahayag sang bise alkalde sa ciudad sang Bacolod nga mahimo pa makabyahe ang mga traditional jeepneys matapos nga gin-ayo sa Land Transportation Franchising and Regulatory Board (LTFRB) nga pahanugutan tubtob nga makapagwa na sang desisyon ang Korte Suprema sa ginrequest nga Temporary Restraining Order sa consolidation process sang public utility vehicle (PUV) modernization program.
Sa interview sang Bombo Radyo Bacolod kay Vice Mayor El Cid Familiaran, ginpahanugutan sang LTFRB ang request ni Bacolod City Mayor Alfredo “Albee” Benitez nga ipatuman na lamang ang pagpanakop sa mga nagabyahe nga unconsolidated jeepneys kun nakapagwa na sang sabat ang Korte Suprema.
Bangod sini, sarang pa nga makabyahe ang mga unconsolidated jeepneys apang sila ang dapat nga magrenew sang registration.
Suno kay Familiaran, ini ang kaangay man sa Provisional Authority, apang verbal lamang nga kasugtanan.
Paathag sang Bise Alkalde nga ang bottom line sa pagpahanugot amo nga may-ara sang makaon sa lamesa ang mga maapektuhan nga drivers kag operators sa isa ukon duha ka bulan samtang wala pa sang desisyon.
Nagapati si Familiaran nga wala sang malain sa pagpahanugot bangod mahimo makita sang Korte Suprema nga resonable man ang ila mga demand kag ligwaton ang desisyon sang Department of Transportation (DOTr).
Suno diri, ang luyag sang mga unconsolidated jeepney driver kag operators nga magbakal sang local model sang modernized jeepney nga mas bulubarato sangsa imported.
Paathag sini nga may mga naggwa na nga mga model sang modernized jeepneys nga human sang mga local manufacturers kag nakasunod sa requirement sang DOTr nga dapat environment friendly.
Suno kay Familiaran, ginabalanse lamang nila ang pagprotekta sa mga nagsulod sa modernization program kasubong man ang mga wala nagsulod nga indi magutman.
Dugang pa sang Bise Alkalde nga indi lamang ikaayo sang traditional ukon modernized jeepney drivers and operators ang ila gina-ulikdan, subong man ang ikaayo sang riding public.
