Ginkumpirmar sang tagpamaba sa Land Transportation Franchising and Regulatory Board (LTFRB) Region 6 nga ginakabig na nga colorum ang mga traditional jeepneys sumugod Enero 1 magluwas lamang sa mga nagsulod sa kooperatiba nga ginpahanugutan nga makabyahe tubtob sa Disyembre 31.Sa interview sang Bombo Radyo Bacolod kay Atty. Jun Altura, information officer sa LTFRB Region 6, ginkumpirmar sini nga nagpadulong sa ila ang pamunuan sang Bacolod Alliance for Commuters Operators and Drivers (BACOD).
Apang pahanumdom sini nga sa regulasyon sang LTFRB, tanan nga mga traditional jeepneys nga wala napaconsolidate as of December 31, 2023, marevoke na ang Provisional Authority sa pagbyahe epektibo Enero 1, 2024.
Sa tion nga sila ang padayun pa nga magbyahe, igakonsiderar na ang mga ini nga colorum kag mahimo dakpon.
Paathag ni Altura nga wala na sang ginhatag pa nga extension, apang ang mga nagpaconsolidate ang hatagan pa sang kahigayunan nga makabyahe sang traditional jeepney tubtob sa Disyembre 31, 2024.
Suno diri, ang masaligan na lamang sang mga wala nagpaconsolidate amo ang sabat sang Korte Suprema sa ginpasaka nga petition para sa Temporary Restraining Order (TRO) sa consolidation requirement kag kun marule-out sang Korte Suprema nga indi legal ang modernization program kag ikanselar ang mga mandato sang LTFRB kag Department of Transportation (DOTr).
Sa ila data, 23 porsyento lamang sang mga traditional jeepney ang nakapaconsolidate sa Bacolod City ukon kabug-usan nga 566 ka units.
Samtang antes pa ang pagpatuman, may-ara sang masobra 2,300 ka mga units sang traditional jeepneys ang may prangkisa sa ciudad.
Suno diri, sa Iloilo halos 80 porsyento na ang nakapaconsolidate kag ginalantaw sini nga kadam-an sa mga drivers sa ciudad sang Bacolod ang mahimo nagsalig nga indi madayun ang modernization program.
Sa pihak nga bahin sa Bacolod City ang required nga numero sang modernized jeepneys ang yara sa 1,099, kag nakadeliver na sang 590.
Paathag ni Altura nga kinahanglan nga madeliver ang nabilin nga units sa sulod sang 27 ka bulan.
