Aminado ang market vendor sa Libertad Public Market nga nagmahal ang kalabanan nga mga utanon bangod sa manubo nga supply.
Suno kay Inday Fonsing, dako ang pagtaas sa presyo sang mga utanon kaangay na lamang sang kalabasa nga P30 na sa karun gikan sa anay P20 ang kada kilo.
Ang Carrots naman nga anay P25 lang ang kilo ang yara na sa karun sa P50.
Pahayag sini nga ang mga supply sang utanon ang nagikan sa Canlaon kag ini ang ginadeliver sa ila kada gab-i.
Sila ang nagabaligya naman tubtob sa alas-6:00 sang aga, kun sa diin aminado ini nga kun kaisa halos mabatak lang nila ang ila nga capital.
Nagapati ini nga ang pagbuhin sang supply sang utanon sa Canlaon ang bangod sa pagmahal sang abono kag hilo.
Paathag ni Fonsing nga madamo ang wala na nagabalik sa pagtanom ukon indi makatanom sang nagakaigo nga kadamuon sang utanon bangod sa tuman ka mahal nga abono kag hilo, samtang tuman naman ka barato ang pamakal sa ila.
Apang ginalantaw man sini nga may kaangtanan man ang season sa pagbag-o sang presyo bangod sa masami Enero tubtob Mayo barato ang presyo sang utanon samtang nagamahal naman sa Setyembre tubtob Desyembre.
Sa pihak nga bahin, apisar nga may pagmahal sa mga utanon, pila naman ka mga engredients ang nagbarato kaangay sang Baguio Beans nga sadto P50 tubtob P60 ang kilo, karun P40 nalang kasubong man ang Kamatis nga sang tinalikdan P50 ang kada kilo karun P30 nalang nga kun indi mapaubos ila nalang nga ginapilak.
Sa pihak nga bahin, ginpahayag naman ni Jenelyn Dela Cruz, tag-iya sang karenderia nga nagpamahal man ini sang presyo sang iya nga mga niluto bangod sa pagmahal sang mga ingredients.
Suno diri, ang mga putahe nga manok nga sadto P40 ang ginpasaka na sini sa P50 samtang ang mga karne naman ang masobra na sa P50.
Samtang ang mga utan naman sini nga sadto P15 ang karun ginpasaka na sini sa P20 tubtob P25.
Paathag ni Dela Cruz nga P10 tubtob P15 lang ang ginpasaka sini sa presyo sang mga niluto.
Apang kun indi naman ini magapasaka sang presyo, gina-adjust nalang sini ang kadamuon sang servings.
Dugang pa sini nga wala man nagareklamo ang mga customers bangod aminado man ang mga ini nga tanan ang balaklon ang nagmahal na.
