Nagapadayon pa ang pagkuha sang special permit ang mga vendors nga magabaligya sa Bacolod Vendors Christmas Bazaar sa palibot sang Bacolod Public Plaza.
Sa interview sang Bombo Radyo kay Executive Assistant to the Mayor Ernie Pineda, nagapadayon pa ang pagproseso sang mga vendors sang special permit samtang may iban naman nga nakaplastar na sang ila mga baligya.
Suno sa iya, sa atubangan sang Cathedral, 55 ka mga vendors ang maaigo, siyam sa Gatuslao Street, 38 sa San Juan Street kag kapin 48 sa Gonzaga Street.
Apang sa karun, suno diri, 12 pa lang ang nakasecure na sang permit sa San Juan Street kag 32 naman ang nagaproseso sa dalan Gonzaga.
Suno kay Pineda, ang Rizal Street kag bahin sang dalan Gatuslao ang iya ka Diocese of Bacolod; ang nabilin nga bahin sang dalan Gatuslao ang pwestuhan sang Bacolod Gatuslao Vendors Association; ang San Juan Street ang iga-occupy sang Bacolod Vendors Downtown Association; samtang ang dalan Gonzaga ang baligyaan sang Fruit Vendors Association.
Suno sa executive assistant, apisar sang pagpamahog sang COVID-19, may yara man sang komunikasyon ang emergency operations center agud masiguro nga nagasunod ang mga ini sa minimum health protocols.
