Ginpatigayon kahapon ang raffle sa mga vendors nga magabaligya sa ground floor sang annex building sang Libertad Public Market.
Sa interview sang Bombo Radyo Bacolod kay Bacolod City Administrator Atty. Pacifico Maghari, 287 ang qualified sa raffle apang 91 lamang ang bakante nga pwesto.
Suno kay Maghari, ang makagabot sang numero amo ang may pwesto samtang ideyahan sang ciudad nga makakuha sang pwesto sa night market ang wala nagabutan.
Suno sa iya, pagaplanuhan nila ni Councilor Celia Floor, chairman sang committee on market and slaughterhouse, kag ni Bacolod City Legal Officer Atty. Romeo Carlos Ting Jr. agud bisan paano maakomodar ang tanan nga vendors.
Suno kay Maghari, kinahanglan nga limpyuhon ang mga nagabaligya sa sidewalk kag kinahanglan man nila nga mapangitaan sang mapwestohan ang mga wala nakakuha sang pwesto sa raffle.
Nagapati man si Maghari nga ang mga qualified vendors lamang ang nagtambong sa raffle bangud nakapasa man ang mga ini sang papeles kag ginpaidalom man sa mapping sa pagpanguna ni Councilor Celia Flor.
Dako ang kalipay ni Donato Aguda nga nakagabot ini sang numero sa ginpatigayon nga raffle.
Suno kay Aguda, temprano pa ini nga nagpila bangud luyag gid sini nga makakuha sang pwesto.
Dako ang pagpasalamat sini bangud nga nakakuha ini sang numero agud nga makapadayon sa pagbaligya bangud wala man siya sang income kun indi siya makabaligya.
Samtang, dismayado naman si Amalia Amar nga wala ini nakakuha sang stall.
Suno kay Amar, 30 anyos na ini nga nagabaligya sa Libertad Public Market apang siya ang wala nakakuha sang pwesto.
Suno diri, paano na siya karun bangud wala siya sang kuhaan sang ibakal sang maintenance sang iya amay nga 83 anyos kag maintenance sa hypertension.
Ginpahayag sini nga dapat mahatagan gid siya sang iya nga mabaligyaan bangud kinahanglan niya nga may income.
Iban naman nga vendors ang nagpanindugan nga kuntani ang 150 lang nga yara sa palibot sang Libertad Market ang ginraffle kag wala na ginlakip ang yara sa bagsakan.
