Nagalaom ang mga vendors sa Bacolod North Public Market sa Dalan Burgos nga may pagbag-o sa pagsulundan sang city government sa mga awardan sang tapangko sa ginrenovate nga merkado.
Sa interview sang Bombo Radyo kay Lucelyn Dela Paz, presidente sang Burgos Public Market Vendors Association, wala nadayon ang raffle nga natalana kuntani sang Pebrero 24 bangud sa pila ka changes nga luyag sang mga vendors.
Suno diri, indi magpasugot ang awardan sang pwesto nga bayaran sini ang utang sang iya ginbuslan nga awardee sang tapangko.
Ang mga anay awardee ang nag-untat na sa pagbaligya kag wala na nakabalik tubtub subong apang wala nila nabayaran ang ila nga obligasyon sa city government.
Suno kay Dela Paz, nagalaom sila nga mabuligan sang city government kun ano ang maayo nga himuon sa mga tapangko nga ila ioccupy bangud indi man mahimo nga bayaran ni Pedro ang balayran ni Juan.
May yara sang 140 ka pwesto nga available sa sulod sang Burgos Public Market kag ila tinguhaan nga makasulod ang tanan nga mga vendors.
Suno kay Dela Paz, target sang mga ini nga makasulod na sa merkado sa bulan sang Marso, ilabi na ang mga yara nagabaligya sa Burgos-Ramos Streets. Samtang, wala naman sang iban nga reklamo ang mga vendors sa Bacolod North Public Market sa Dalan Burgos magluwas sa pagbayad sa arrears sang buslan nga awardee.
Sa interview sang Bombo Radyo sa manugbaligya nga si Jenelyn Mediavilla, sila anay ang nagtukod sang ila mga magagmay nga pwesto sa Burgos-Ramos Streets samtang ginahulat pa ang meeting sang ila asosasyon sa petsa sang raffle kag pagpwesto sa sulod sang merkado matapos nga wala ini natigayon sang Pebrero 24.
Nakita naman sini ang ngalan sa listahan nga ginplastar para makita sang publiko kag wala naman ini sang reklamo bangod nga naplastar naman ang tanan.
Samtang ginalauman naman sini nga matigayon ang raffle kag sila ang makasaylo sa sulod sang merkado sa pag-abot sang bulan sang Marso.
