Nagapanawagan ang mga vendors sa Bacolod Public Plaza nga mabuligan man sila sang alkalde sang ciudad nga mahatagan sang pwesto nga mahimo mabaligyaan bangud natalana na ang mga ini nga indi na makabaligya didto.
Madumduman nga indi na mag-issue ang Sangguniang Panlungsod sang Bacolod sang permit para makabaligya sa Bacolod City Public Plaza.
Ulihi nga nagbaligya ang mga vendors sang Enero 7 sa plaza sang ciudad.
Una na nga ginpahayag ni Bacolod City Mayor Alfredo Albee Benitez, ang pagpahalin sa mga vendors ang una nila nga tikang agud mapanami ang plaza.
Suno diri, mahimo nga sayluhon ang mga vendors kag sila hatagan sang pwesto ilabi na sa malapit nga area nga may yara sang event.
Pahayag ni Benitez, ginadumdum man sini nga ang mga nagabaligya sa plaza ang nagapangita man sang ila palangabuhian amo nga pangitaan sila sang sayluhan.
Samtang suno kay Marilyn Lagarte, ang pagbaligya ang ila na nga palangabuhian kag kun pahalinon sila sa public plaza madulaan sila sang palangabuhian.
Suno diri wala pa man sila nakabaton sang abiso kun san-o ang mga ini magahalin apang may yara sila sang impormasyon nga nabaton nga pagameetingon man sila sang city government.
Bangud sini, nagapangabay man ini nga mabuligan sila sang ciudad agud nga makapadayon sila sa pagbaligya kasunod sang pagpahalin sa ila plaza.// Suno diri, kinahanglan nila sang makuhaan sang ila gastuhon sa adlaw-adlaw.
