Ginsugata sang pagpamatok ang ginpatigayon nga surveillance swab testing sa tatlo ka dalagko nga merkado sa ciudad sang Bacolod.
Nahibaluan nga Nagpagwa sang Executive Order No. 66 series of 2020 si Bacolod City Mayor Evelio “Bing” Leonardia tuhoy sa patigayunon nga mandatory surveillance testing sa Central, Burgos kag Libertad Public Market nga ginduso sang Emergency Operation Center (EOC) nga ginapangunahan ni Inter-Agency Task Force (IATF) deputy chief implementer for Visayas Gen. Melquiades Feliciano.
Sa interview sang Bombo Radyo Bacolod kay Lloyd Ybañez, isa ka meat vendor sa Libertad Public Market, ginpahayag sini nga indi siya luyag magpa-swab test bangud nga ila man ini nga kinamatarong.
Dugang pa sini nga pananglitan magpositibo sila, sin-o ang mahatag sang kinahanglanon sang pamilya sini.
Ginpanindugan man sini nga indi man pwede nga indi sila pagpabaligayaon kun indi sila magapasakop sa surveillance testing.
Samtang, nagpaidalom naman sa swab test si James Zaldy, manugbaligya sang lubi sa Libertad Public Market bangud suno sa iya mandatory ini.
Dugang pa ni Zaldy nga obligado sila nga magpaswab agud nga makapadayon sa pagbaligya.
Wala naman ini sang ideya kun may ihatag nga ayuda ang city government pananglitan nga magpositibo ini sa COVID-19.
Nagapati naman si Alma Quiano Cabungcal, manugbaligya sang uga sa Libertad Market, ginpahayag sini nga nagpasugot siya nga mapaidalom sa swab testing agud nga mahibaluan kun positibo ini sa virus ukon indi.
Dugang pa sini nga luyag niya man nga maproteksyunan ang iya nga pamilya.
