Nagaplano ang mga manugbaligya sang prutas sa Libertad Public Market nga siraduhon sang napulo ka adlaw ang ila balaligyaan sa baylo nga ipaidalom sila sa mandatory swab testing santo sa ginadihon sang syudad.
Sa interview sang Bombo Radyo Bacolod kay Jessie Mainit, isa sa mga nagabaligya sang prutas, indi sila pabor sa swab testing bangud kun magpositibo sila sa COVID-19 mabudlay na magtumod sang nakasalamuha nila sa bilog nga adlaw bangud wala man sila nakahibalo kun sin-o kag sa diin nagahalin ang ila nga mga kustomer kag mga nagabulante sa merkado.
Suno sa iya, nagasunod man sila sa basic health protocols kaangay sang pagsuksok sang facemask, face shield kag social distancing.
Wala man suno diri nagadugay ang ila mga customer sa tion nga magbakal.
Ginpahayag man sini nga kapin 60 porsyento ang nadula sa ila kita humalin sang nagkapandemya kag nadugangan pa ang kapierdihan sang wala ginpahanugutan ang public transportation sang ginpaidalom ang syudad sa Modified Enhanced Community Quarantine (MECQ).
Suno kay Mainit, nagaplano ang kapin 600 ka miyembro sang ila asosasyon nga ipasira nalang sang napulo ka adlaw ang merkado apang wala lang sang swab testing kag agwantahon lang nila nga wala sila sang kita sa napulo ka adlaw.
Apang wala man sila sang mahimo kun dayunon ang mandatory swab testing sa mga vendors.
