Magapatigayon sang noise barrage subong nga adlaw ang mga market vendors sa Libertad Public Market agud pamatukan ang plano sang city government nga mandatory swab testing.
Una diri, wala naga-ugyon ang mga market vendors sa Libertad Public Market sa plano sang ciudad nga pool testing nga pagahimuon sa tatlo ka dalagko nga merkado sa ciudad.
Suno kay Regina Labrador sang Barangay Granada, maga-ugyon ang mga ini sa swab test kun may ginbatyag nga balatian apang wala man ni isa sa mga manugbaligya nga may ginabatyag.
Suno diri, kun magpatigayon sang swab test kuntani ang tanan nalang kag indi lang ang mga vendors.
Dugang pa ni Labrador nga mas may bentaha pa ang mga manugbaligya kun ikaayong lawas ang pagabasehan bangod nagakaon ang mga ini sang utan kag prutas kada adlaw.
Plano man sini nga makigbahin sa plano nga noise barrage subong nga adlaw agud nga pamatukan ang luyag sang Bacolod City Government nga pool testing.
Suno pa diri, dako na nga butang ang pagsirado sang merkado kada Domingo.
Nagapati man si Labrador nga may ginapakigbato ang mga opisyales apang ginapanindugan man sini nga may ginapakigbato man ang mga vendors.
Ginapaligban naman sini nga kun magpositibo kag ipaidalom sa isolation, wala sang mapakaon sa pamilya sini ilabi na ang mga kabataan.
Wala naman ini nagapati nga pakaunon sang gobyerno ang pamilya nga mabilin sa sulod sang 14 ka adlaw.
Samtang kun may ginahatag naman nga delatas kag noodles, indi ini maayo sa ikaayong lawas.
Suno diri, may yara pa ini sang ginagatas kag wala ini nagapati nga sabton sang local government ang gatas sang anak.
Magluwas sa suporta sa pamilya, daku man ang posibilidad nga magkaladunot nalang ang mga mabilin nga baligya sang mga vendor kun magpositibo kag magadugang pa ini sa kabudlayan karun nga tuman ka iwat ang konsumidor.
Palamangkutanun naman sa karun kun ngaa nadula na ang iban nga mga balatian kag halos tanan nalang ang nangin COVID-19.
Suno kay Labrador, bangod sa pagbaylo sang tiyempo, normal lang kuntani ang mga trangkaso, apang sa karun ginakabig na ini nga COVID-19.
Ginapatihan naman sini nga perwisyo lang ang matuga sang pool testing kag imbes nga mabuligan ang ekonomiya, magasarurot pa ini.
Samtang wala man naga-ugyon sa pool testing ang isa pa ka market vendor nga si Ann Malou Sumagaysay.
Naga-ugyon man ini sa pahayag sang kaupod nga si Labrador kag magapasugot lang nga makuhaan sang swab test kun masiguro nga masuportahan ang pamilya.
Ginkumpirmar naman sini nga masobra 500 ang kabug-usan nga populasyon sang vendors sa nasambit nga merkado.
