Sapulon pa ang mga Manokan Country vendors agud ma-orient sa house rules sang SM Prime Holdings Inc. antes iturn-over ang mga yabi para sa temporaryo site.
Nakapatigayon na sang inspection ang Bacolod City Engineer’s Office agud maseguro nga sarang nagid mapwestuhan ang mga temporary stalls.
Suno kay Bacolod City Legal Officer Atty Romeo Carlos Ting Jr., luyag nila nga maseguro nga nakahibalo na ang mga vendors sang House rules sang pribado nga kompanya antes paman magsaylo sa pwesto.
Sila ang sapulon ni Councilor Celia Flor, chairperson sa Committee on Markets sa Sangguniang Panlungsod.
Dugang pa ni Ting nga ang nasambitan nga house rules amo man ang ipatuman sa tion nga mahuman na ang bag-o nga Manokan Country, gani mas maayo nga nakahibalo na ang mga vendors.
Kalakip diri ang nahanungod sa pagdumili sa pagtulog sa pwesto.
Nahibaluan nga madamo sang ginapili nga magtulog sa ila daan nga pwesto sa kahangawa nga ini ang sudlon.
Nagpasalig naman si Ting nga magabutang sang Public Order and Safety Office (POSO) guards sa pwesto nga amo ang magaseguro sa lugar.
Samtang ginalantaw man ang posibilidad sang pagsirado sang Fr. Ferrero Street sa tion sang Masskara Festival 2024 bangod ginapaabot na nga madamo sang magabisita.
