Naghingyo ang mga vendors sa palibot sang Libertad Public Market nga kuntani mangin patas ang patigayunon nga raffle bwas sa aga agud madeterminar kun sin-o ang maga-occupy sa mga stalls sa annex building.
Kaina sang aga, nagpadulong sa Bombo Radyo ang 10 ka mga vendors sa Libertad Market agud magpadangat sang ila nga sentimyento sa in-charge sa raffle.
Suno kay Alyas Toto, may yara sang raffle bwas agud madeterminar kun sin-o ang magapwesto sa mga stall sa annex building apang sa karon, 65 nalang ka pwesto ang igaraffle nagikan sa kabug-usan nga 114.
Suno diri, indi makaigo sa annex building ang 150 ka vendors nga yara sa gwa nagaladlad bangud subong pa lang, 65 nalang ka stalls ang nabilin bangud nareserve na ang iban.
Suno sa mga nagapwesto sa karon sa stalls, awardee ang mga ini bangud may yara sila sang permit nagikan sa city government, samtang ang iban naman ang nareserve sa mga opisyales sang merkado.
Sanday Toto ang nagabaligya sang utan kag iban pa nga produkto kag masobra 20 na ka tuig nga nagabaligya sa Libertad Public Market samtang ang iban niya nga kaupod ang nagabaligya sa merkado antes pa ginpatindog ang annex building.
Suno diri, kuntani wala sang pinilian sa mga vendors nga makasulod sa annex building bangud kun indi man sila tanan makapwesto diri, patas ini para sa tanan nga indi magabutan sa raffle.
Ang raffle ang patigayunon alas-8:00 bwas sa aga.
