Natalana nga sapulon sang Local Market Committee ang mga vendors sa tatlo ka dalagkuan nga merkado sa ciudad sang Bacolod agud isa-isa nga mapatpat kag masolbar ang mga issues.
Sa interview sang Bombo Radyo kay Bacolod City Administrator Atty Mark Mayo, sa inaugural address ni Bacolod City Mayor Greg Gasataya, isa sa iya tutukan ang mga problema sa merkado.
Bilang initial step, ginpahayag ni Mayo nga sila ang magapatigayon sang flushing activities.
Natalana ang flushing activity sa Libertad Public Market karun sa gab-i samtang sa Sabado sa gab-i naman sa Burgos Public Market kag Bacolod Central Market.
Gab-i patigayunon ang flushing agud wala sang maapektuhan kag matinlo na ang merkado sa sunod nga pagbukas.
Apang paathag ni Mayo nga ang luyag gid nga masolusyonan sang alkalde amo ang isyu sa pagpanag-iya sang mga stall ukon blocks, mga unsettled arrears, kag mga dapat bag-uhon nga mga regulasyon.
Suno diri, ipatawag nila ang mga vendors agud makadiskusyon, ukon mahimo man nga ang Local Market Committee na mismo amo ang maga-isa isa sa mga merkado para sa diskusyon.
Luyag nila maseguro nga lehitimo ang mga naga-occupy sa mga stalls kag tsekyaron kun sin-o pa ang mga wala makabayad sang arrears.
Samtang ang pagbag-o sang regulasyon ang dapat nga mabalay man alligned sa mga objectives sang ciudad.
Aminado si Mayo nga sarang masolusyonan gilayon ang gamay nga mga kalay-uhon apang kun magapatigayon sang rennovation ini ang magakinahanglan pa sang malawig nga diskusyon kag kuhaan sang budget.
Tsekyaron man nila kun sarang na nga magamit ang ginkay-o nga bahin sang Bacolod Central Market matapos masunog sang tinalikdan.
