Ginkumpirmar sang tagpamaba sang Bacolod City Police Office nga mandatory naman ang pagsuksok sang face shield sa headquarters sang BCPO.
Sa interview sang Bombo Radyo kay Police Lt. Col. Ariel Pico, ginpahayag sini nga apisar mandatory lang ang pagsuksok sang faceshield sa mga pampubliko nga salakyan, sarang man ang mga pribado nga establishmento nga maka-implementar sini.
Gani, suno kay Pico, indi lang mga katapo sang kapulisan ang kinahanglan magsuksok sini kundi subong man ang mga nagatransact bangud indi na pagpahanugutan nga makasulod sa ila headquarters kag makaproseso sang transakyon kun wala sang face shield.
Nagpang-abiso man ang tagpamaba sa mga pasahero ilabi na sa mga driver nga hugot gid nga magsunod sa nasambit nga mando.
Nahibaluan nga P500 ang penalidad sa driver sa first offense kun madakpan ini sang BTAO; P1,000 para sa second offense; kag P1,500 sa third offense kag revocation sang lisensya santo sa city ordinance 35 ni Mayor Evelio “Bing” Leonardia.
Samtang, kun Land Transportation Office naman ang makadakop, P2,000 ang penalidad sa first offense; P3,000 sa second offense; kag P10,000 sa third offense, revocation sang lisensya kag kinahanglan magpaidalum sa seminar.
Gindugang man ni Pico nga sarang nga mapasakaan sang kaso nga reckless driving ang driver kun pila na ka beses ini nga nagabayolar.
Suno sa iya, kun maglakat sa dalan, sarang nga makagamit lang sang facemask apang nagpang-engganyo ini nga magsuksok nalang sang face shield bilang dugang nga proteksyon.
