Ginalauman nga madugangan pa ang mga volunteers sang Parish Pastoral Council for Responsible Voting (PPCRV) sa Negros Occidental.
Sa interview sang Bombo Radyo Bacolod kay Fr. Chris Gonzales, pinuno sang PPCRV – Negros Occidental, may yara sang 1500 ka mga volunteers ang PPCRV sa karun kag ginapaabot pa nga ini ang madugangan.
Suno kay Gonzales nagpatigayon sila sang conference sang mga volunteers sang Sabado kag gintambungan sang mga representative kag mga members.
Ginkalipay man ni Gonzales nga ang mga volunteers mismo ang nagapabutyag sang willingness sa pagvolunteer agud magbantay sa nagahilapit nga eleksyon.
Suno pa diri ginhatagan man sila sang Commission on Elections (COMELEC) sang ila dapat nga himuon sa adlaw sang piniliay.
Ginakabig man sang pinuno sang PPCRV Negros Occidental nga ang pagpungko sang COMELEC sa ila meeting ang makapabakod pa sang ila relasyon sa ahensya samtang ginakilala naman sila bilang citizens arm.
Suno diri nakahanda na sila kaupod ang mga volunteers.
Amat amat naman nga ginahanda ang ila nga election paraphernalia kaangay lamang sang ila mga desk nga igabutang sa adlaw sang election kasubong man ang ila nga mga committees.
Excited naman ang mga volunteers kag ginkalipay man ni Gonzales nga positibo ang paglantaw sang mga ini nga importante ang ila nga mga papel sa subong nga eleksyon.
